PLUIJM: NITAFURAHI NIKIWAPA SINGIDA TAJI LA FA

Kocha wa Singida United, Hans van Pluijm ameweka wazi kuwa atafurahi kama awaachia ubingwa wa FA 'Walima alizeti' hao katika mchezo wa fainali dhidi ya Mtibwa Sugar jioni ya leo.

Fainali hiyo itachezwa katika uwanja wa Sheikh Amri Abeid mjini Arusha saa 9 alasiri huku wadau wengi wakiendelea kumimimika jijini humo kutoka sehemu mbalimbali kuitazama.

Mchezo huo ni wa mwisho kwa Pluijm kuiongoza Singida kwakua tayari amejiunga na klabu ya Azam FC na baada ya mechi kumalizika ataondoka na viongozi wa matajiri hao kurejea Dar es Salaam.

Mholanzi huyo amesema akichukua ubingwa itakuwa ni historia kubwa kwake na klabu pia lakini kwakua anaondoka itakuwa amewaachia zawadi nzuri.

Hata hivyo Pluijm amekiri kuwa hana uhakika wa kufanikisha jambo hilo kwakua Mtibwa ni timu nzuri na ina wachezaji bora hivyo itabidi wapambane ili kukamilisha azma hiyo.

"Ubingwa siku zote ni historia nzuri kwa wachezaji na klabu lakini kwakua sitakuwa na Singida msimu ujao nitafurahi kama nitawapa ubingwa wa FA," alisema Pluijm.