SIMBA YATAMANI KUKUTANA NA YANGA NUSU FAINALI SPORTPESA

Mabingwa wa ligi kuu bara timu ya Simba inatamani kukutana na watani wao wa jadi Yanga katika nusu fainali ya michuano ya SportPesa Super Cup itakayoanza Jumapili nchini Kenya.

Endapo Yanga itashinda mchezo wao dhidi ya KK Homeboyz na Simba ikaifunga Sharks zitakutana katika nusu fainali ya michuano hiyo itakayopigwa katika jiji la Nairobi.

Mkuu wa kitengo cha habari na Mawasiliano wa klabu ya Simba, Hajji Manara amesema itakuwa jambo zuri kama watakuna na watani wao kwenye michuano hiyo katika mchezo ambao wana uhakika wa kupata matokeo ya ushindi.

"Timu ilifika jana Kenya wachezaji wapo kwenye hali nzuri na tutafurahi sana kama nusu fainali tutakutana na Yanga, mechi itakuwa nzuri lakini tutawafunga tena idadi nzuri ya mabao" alisema Manara.

Katika mchezo wa mzunguko wa pili wa ligi uliofanyika uwanja wa Taifa Simba ilipata ushindi wa bao moja.

Yanga itafungua michuano Jumapili saa 7 mchana kwa kucheza na Homeboyz wakati Simba itashuka dimbani Jumatatu.