SIMBA: TUNAIHESHIMU GOR LAKINI HATUIOGOPI

Uongozi wa klabu ya Simba umekiri kuwa mchezo wa kesho wa fainali ya SportPesa Super Cup dhidi ya Gor Mahia utakuwa mgumu ingawa wamejipanga kurudi na taji nyumbani.

Gor ndio mabingwa watetezi wa michuano hiyo huku pia wakionyesha uwezo mkubwa katika mashindano ya mwaka huu kitu ambacho Simba wamekichukulia tahadhari.

Msemaji wa klabu hiyo, Hajji Manara amesema wataingia uwanjani kwa kuiheshimu Gor kutokana na ubora wao lakini hawawezi kuigopa kamwe.

Manara amesema wamewaambia  wachezaji umuhimu wa mchezo huo kwakua licha ya bingwa kupata zawadi ya pesa na kombe lakini pia safari ya kwenda Uingereza katika uwanja Goodison Park kucheza na Everton ni jambo kubwa kwao.

"Tunaamini mchezo utakuwa mgumu Gor ni timu nzuri na ndio mabingwa watetezi wa michuano hii lakini hatuiogopi na tumejipanga kushinda na tunamuomba Mungu atuongoze katika hili," alisema Manara.

Manara amewaomba mashabiki wa Simba kutoka sehemu mbalimbali kujitokeza kwa wingi kuipa sapoti timu ili ifanye vizuri.