SIMBA YATINGA NUSU FAINALI SPORTPESA SUPER CUP

Mabingwa wa Tanzania bara timu ya Simba imeingia nusu  fainali ya michuano ya SportPesa Super Cup baada ya kuifunga Kariobangi Sharks kwa mikwaju ya penati 3-2.

Mchezo huo ulienda katika hatua ya penati baada ya kumalizika kwa sare ya bila kufungana kwenye muda wa kawaida.

Simba haikuwa kwenye kiwango bora kama ilivyotegemewa na wengi ikionekana kuzidiwa hasa kipindi cha pili mwanzoni.

Mlinda mlango Aishi Manula alicheza mikwaju miwili ya penati huku moja ikigonga mwamba.

Penati za Simba zilifungwa na Haruna Niyonzima, Erasto Nyoni na Jonas Mkude wakati Mohammed Hussein na Paul Bukaba wakipoteza penati zao.

Simba itacheza na Kakamega Homeboyz katika mchezo wa nusu fainali Juni 6.