MASOUD AWAACHIA SIMBA UAMUZI WA KUMPA MIKOBA YA LECHANTRE

Kocha msaidizi wa timu ya Simba, Masoud Djuma amesema maamuzi ya kumfanya kuwa kocha mkuu kuchukua nafasi Pierre Lechantre yapo kwenye uongozi wa juu wa Wekundu hao sio kwake.

Katika mchezo wa jana wa nusu fainali dhidi ya KK Homeboyz, Lechantre alikaa jukwaani akishuhudia mchezo huo kitu ambacho kimeashiria mambo hayako sawa ndani ya mabingwa hao wa Tanzania.

Masoud aliiongoza Simba Mechi ya Jana dhidi ya Kakamega Homeboys

Masoud amesema aliajiriwa Simba kama kocha msaidizi ndio mkataba wake unavyosema lakini kuchukua mikoba ya Mfaransa huyo itategemea na uongozi utakavyoamua.

"Mimi kuwa kocha mkuu itategemea na maamuzi ya uongozi, hilo halipo ndani ya uwezo wangu kwakua nimeajiriwa kama kocha msaidizi kwahiyo mabadiliko yoyote watafanya wenyewe mabosi," alisema Masoud.

Leo saa 5 asubuhi mkuu wa kitengo cha habari na mawasiliano wa klabu hiyo, Hajji Manara ataongea na Waandishi kutoa ufafanuzi juu ya jambo.