KAGERE AIPELEKA GOR MAHIA FAINALI SPORTPESA

Mabao mawili ya mshambuliaji Meddy Kagere yametosha kuipeleka Gor Mahia fainali ya michuano ya SportPesa Super Cup baada ya kuilaza Singida United 2-0.

Kagere amefikisha mabao matatu katika michuano hiyo baada ya kufunga moja katika mchezo wa kwanza dhidi ya JKU.

Gor itakutana na Simba katika fainali ya michuano hiyo ambayo iliifunga Kakamega Homeboyz kwa mikwaju ya penati 5-4 katika nusu fainali ya kwanza.

Kagere aliibuka mfungaji bora wa michuano iliyopita ambayo ilifanyika jijini Dar es Salaam baada ya kufunga mabao matatu.

Katika mchezo wa leo Kagere alifunga bao la kwanza dakika ya 37 kwa kichwa kabla ya kuongeza la pili dakika ya 88.

Simba na Gor zote hajizaruhusu nyavu zao kutikishwa lakini Gor wamefunga mabao matano huku Wekundu hao wakiwa hawajafunga bao lolote.

Mchezo wa fainali ya michuano hiyo utapigwa siku ya Jumapili saa 9 alasiri ukitanguliwa na mechi ya mshindi wa tatu Kati ya Kakamega dhidi ya Singida.