ALICHOSEMA KOCHA MOROCO KUHUSU MECHI YA GOR MAHIA

Kocha mkuu wa Singida United, Hemed Moroco amekiri kuwa mchezo wao wa nusu fainali ya michuano ya SportPesa Super Cup dhidi ya Gor Mahia utakuwa ngumu kwakua wanakutana na bingwa mtetezi.

Singida imeingia hatua hiyo jana baada ya kuitoa AFC Leopards kwa mikwaju ya penati 4-2 baada ya kutoka sare ya bila kufungana kwenye muda wa kawaida.

Kocha Moroco ambaye ameiongoza Singida mechi moja tangu achukue mikoba ya Hans van Pluijm amesema mchezo huo utakuwa mgumu kutokana na uimara wa wapinzani wao.

Moroco ameongeza kuwa licha ya kuiheshimu Gor lakini hawawahofii na wamepata siku tatu ya kujiandaa  kuelekea mchezo huo na wanaamini watafanya vizuri.

"Gor ni timu nzuri, ni mabingwa watetezi tunategemea kupata upinzani mkubwa lakini tumejiandaa kufanya vizuri na hatimaye tuingie fainali ya michuano hii," alisema Moroco.

Mchezo huo utafanyika keshokutwa Ijumaa katika uwanja wa Afraha saa 9 alasiri.