TSHABALALA: TUTACHEZA NA MAJIMAJI KAMA TUNATAFUTA UBINGWA

Nahodha msaidizi wa timu ya Simba, Mohamed Hussein 'Tshabalala' amesema katika mchezo wa kesho dhidi ya Majimaji watacheza kama wanatafuta ubingwa wa ligi na sio mechi ya kumalizia msimu.

Mechi hiyo kwa Simba ni ya kuweka heshima wakati Majimaji wakihitaji pointi tatu ili kujiweka kwenye mazingira mazuri ya kutoshuka daraja wakiangalia matokeo ya mchezo kati ya Ndanda FC dhidi ya Stand United.

Tshabalala ambaye atakiongoza kikosi cha mabingwa hao baada ya John Bocco kubaki Dar es Salaam amesema mchezo huo wameupa umuhimu mkubwa ili kuweka heshima.

Wiki iliyopita Kagera Sugar walivunja rekodi ya Simba ya kuchukua ubingwa bila kupoteza mechi hivyo Wekundu hao hawataki jambo hilo litokee tena kesho dhidi ya Majimaji.

"Mchezo wa kesho tutacheza kama tunatafuta ubingwa, tunahitaji kumaliza ligi kwa heshima hatutaki suala la Kagera kutokea tena," alisema Tshabalala.

Simba imeacha baadhi ya nyota wake wa kikosi cha kwanza kujiandaa na michuano ya SportPesa Super Cup itakayofanyika nchini Kenya mwezi ujao.