TFF YAMREJESHA KABWILI NGORONGORO

Rais wa Shirikisho la mpira wa miguu Tanzania (TFF), Wallace Karia amesema hakuna mlinda mlango aliyechukua nafasi ya Ramadhani Kabwili kwenye kikosi cha timu ya vijana ya U20 'Ngorongoro Heroes'.

Karia ametoa ufafanuzi kuhusu kuongezwa kwa mlinda mlango kutoka Zanzibar kuwa sio kuchukua nafasi ya Kabwili ila nikuongeza ukubwa wa kikosi katika michuano ya kimataifa.

Kiongozi huyo mkuu wa soka nchini  amesema kilichotokea ni mawasiliano duni baina ya Yanga na kocha Ammy Ninje lakini Kabwili hana kosa hivyo amerejeshwa kikosini.

Ninje alitangaza kumuacha Kabwili baada ya kusafiri na timu yake ya Yanga kwenda Algeria wiki iliyopita kucheza mechi ya kombe la Shirikisho Afrika badala ya kujiunga na vijana wake kambini.

"Kilichotokea ni mawasiliano duni baina ya pande mbili lakini mchezaji hana kosa tutazungumza na Yanga ili kuweka mambo sawa," alisema Karia.

Ngorongo itacheza mechi ya hatua ya pili ya kufuzu fainali za Afrika dhidi ya Mali, Jumapili ijayo katika uwanja wa Taifa.