SINGIDA: SIMBA TAFUTENI KWA KUTANGAZIA UBINGWA SIO NAMFUA

Singida United imeipiga mkwara Simba kuwa isitegemee kutangaza ubingwa katika mchezo dhidi yao utakaopigwa kwenye uwanja wa Namfua, Jumamosi ya Mei 12.

Simba inahitaji pointi mbili kutwaa ubingwa au sare ambapo itachukua kwa uwiano wa mabao kama Yanga itashinda mechi zote sita zilizobaki.

Mkurugenzi mtendaji wa klabu hiyo, Festo Sanga amesema wamejiandaa kuhakikisha wanaibuka na ushindi ili kuwacheleweshea ubingwa huo.

Sanga amesema wanakumbuka kipigo cha mabao 4-0 kutoka Simba kwenye mzunguko wa kwanza uwanja wa Taifa hivyo watahakikisha wanalipa kisasi.

"Tunaiheshimu sana Simba ni timu kubwa lakini isitegemee kutwaa ubingwa kwenye uwanja wa Namfua hilo litakuwa gumu tutahakikisha hatupotezi mchezo," alisema Sanga.

Sanga alisema mchezo huo umerudishwa nyuma siku moja badala ya Mei 13 sasa utapigwa Mei 12.