REKODI YA TAMBWE HAIMUUMIZI KICHWA OKWI

Rekodi ya mabao 21 kwenye ligi inayoshikiliwa na mshambuliaji Amiss Tambwe wa Yanga haimuumizi kichwa kinara wa ufungaji wa sasa Emmanuel Okwi.

Msimu wa 2015/16 Tambwe alikuwa kinara wa ufungaji kwa mabao hayo akimzidi Hamis Kiiza wa Simba kwa mabao mawili.

Okwi aliifungia Simba bao pekee jana katika ushindi dhidi ya Ndanda na kufikisha bao la 20 ambapo amebakisha mawili kuvunja rekodi hiyo.

Mganda huyo amesema kwa sasa anafikiria kuisaidia Simba kupata ubingwa wa ligi msimu na kuhusu kuvunja rekodi ya Tambwe hilo ni jambo la ziada likitokea au lisipotokea ni sawa tu.

Okwi ameongeza kuwa dhamira ya wachezaji wote wa Simba ni kuchukua ubingwa na sio kufikiria mafanikio binafsi kikosini.

"Lengo langu kuu ni kuisaidia Simba kutwaa ubingwa suala la ufungaji ni ziada, suala la kuvunja rekodi ya Tambwe hata silifikirii," alisema Okwi.