SIMBA: KUFUNGWA NA KAGERA MBELE YA RAIS ITAKUWA NGUMU

Uongozi wa mabingwa wapya wa ligi kuu bara timu ya Simba umesema hauwezi kukubali kupoteza mchezo dhidi ya Kagera Sugar siku ya Jumamosi ambao utahudhuriwa na Rais wa Jamhuri ya Muungano wa Tanzania Dk. John Magufuli.

Kagera ilitangaza kuhakikisha inaharibu rekodi ya Simba ya kuchukua ubingwa bila kufungwa msimu huu kitu ambacho mabingwa hao hawatapenda kitokee.

Mkuu wa kitengo cha habari na Mawasiliano wa Simba, Hajji Manara amesema wanaiheshimu Kagera wanategemea kupata upinzani lakini kufungwa itakuwa jambo gumu.

"Kama wamesema wanataka kutuharibia rekodi ya kuchukua ubingwa bila kufungwa, lakini ndio watufunge mbele ya Rais wa nchi? Hilo litakuwa jambo gumu.

"Hata Somalia kuna kipindi ilitangaza vita na Marekani kwahiyo itafahamika hiyo Jumamosi," alisema Manara.

Manara amethibitisha kuwa mchezo huo utachezwa Jumamosi badala ya Jumapili na utaanza saa 8 mchana kwa mujibu wa mabadiliko ya ratiba iliyotolewa na Bodi ya ligi.