RAYON KUTOICHUKULIA POA YANGA LEO

Licha ya Yanga kutofanya vizuri katika mechi zake za karibuni timu ya Rayon Sports imesema haiwezi kuwadharau na wataingia katika mechi ya leo kwa tahadhari kubwa.

Yanga itaikaribisha timu hiyo kutoka Rwanda katika mchezo utakaanza saa 1 jioni uwanja wa Taifa mtanange ambao unatarajiwa kuwa mgumu kutokana uimara wa vikosi vyote.

Kocha mkuu wa Rayon raia Mholanzi, Ivan Minnaert amesema wataingia kwenye mchezo huo bila kuangalia matokeo ya Yanga katika mechi zao za karibuni kwakua wanafahamu wana kikosi imara.

Minnaert ameongeza kuwa wanataraji kupata ushindani mkubwa kutoka kwa Yanga kwakua wapo nyumbani lakini wamejipanga kuhakikisha wanapata ushindi ugenini.

"Yanga sio timu mbaya, hata kama haifanyi vizuri kwenye mechi zao za ligi, hii haitupi kiburi cha kusema tutapata ushindi kirahisi. Tunategemea kupata upinzani mkubwa kutoka kwa Yanga," alisema Mholanzi huyo.

Katika mchezo wa kwanza Yanga ilipoteza kwa mabao 4-0 kutoka kwa USM Alger wakati Rayon ikitoka sare ya bao moja na Gor Mahia.