SIMBA HAINA TAARIFA YA KUTAKA KUTIMKA KWA LECHANTRE

Uongozi wa klabu ya Simba umesema hauna taarifa rasmi za kuhusu kocha wao Pierre Lechantre kutaka kutimka baada ya kupata kibarua nchini Cameroon.

Wiki kadhaa zilizopita kulitoka taarifa kuwa kocha huyo raia wa Ufaransa ni miongoni mwa watu waliomba kibarua cha kuwanoa 'Simba hao wasioshindika' huku akipewa nafasi kubwa ya kupata kazi hiyo.

Mkuu wa kitengo cha habari na mawasiliano wa klabu hiyo, Hajji Manara amesema hawana taarifa kuhusu jambo hilo wakisikia kutoka kwenye mitandao ya kijamii na vyombo vya habari.

"Uongozi hauna taarifa kuhusu jambo hilo kama kocha atatuambia anataka kuondoka hatutamzuia ila kwa sasa linabaki kuwa tetesi tu," alisema Manara.

Mfaransa huyo alisaini mkataba wa miezi sita ambayo inaelekea ukingoni huku mabingwa hao wakionekana kama hawataendelea nae msimu ujao.

Lechantre anatarajia kuwaongoza mabingwa hao katika michuano ya SportPesa Super Cup itakayo fanyika nchini Kenya wiki ijayo.