YANGA YASHANGAA TSHISHIMBI KUHUSISHWA KUTUA SIMBA

Uongozi wa klabu ya Yanga umeshangazwa na taarifa zinazo zagaa kwenye mitandao ya kijamii kuwa kiungo wao Mkongomani Papy Tshishimbi anakaribia kujiunga na watani wao Simba.

Tshishimbi ni miongoni mwa wachezaji walio onyesha uwezo mkubwa msimu huu akitajwa katika orodha ya wachezaji 30 wanaowania tuzo ya mchezaji bora wa ligi.

Msemaji wa klabu hiyo, Dismas Ten amesema kiungo huyo amebakiwa na mkataba wa mwaka mmoja hivyo haruhusiwi hata kuzungumza na timu nyingine kwa mujibu wa kanuni za ligi hivyo wanashangazwa na taarifa hizo.

Ten amesema taarifa hizo hazina ukweli na jambo hilo haliwezi kutokea na Tshishimbi ataendelea kubaki Yanga kwa msimu ujao.

"Hizo taarifa hazina ukweli wowote Tshishimbi bado ana mkataba na sisi na hawezi kwenda popote," alisema Ten.

Tshishimbi alijiunga na Yanga mwezi Julai mwaka jana akitokea Mbabane Swallows ya Swaziland kwa mkataba wa miaka miwili.

Wiki iliyopita mshambuliaji Donald Ngoma alijiunga na klabu ya Azam FC aiktokea kwa vijana hao wa Jangwani.