AZAM YAGAWA PESA ZOTE ZA MSHINDI WA PILI KWA WACHEZAJI

Uongozi wa klabu ya Azam umeamua kugawa kiasi chote cha pesa walizopata kwa kumaliza mshindi wa pili kwenye ligi kwa wachezaji pamoja na benchi la ufundi.

Azam wamechukua uamuzi huo ili kutoa motisha kwa wachezaji hao ambao walimwaga jasho lao kutimiza jambo.

Azam ilijihakikishia kumaliza nafasi ya pili kwenye msimamo wa ligi baada ya usiku wa kuamkia leo kuibuka na ushindi wa mabao 3-1 dhidi ya Yanga katika mchezo wa mwisho wa msimu.

Msemaji wa klabu hiyo, Jaffer Idd ameiambia SDF Sports kuwa kiasi chote cha pesa walichopata kutoka kwa wadhamini wakuu wa ligi hiyo kampuni ya mawasiliano ya Vodacom wamekigawanya chote kwa wachezaji na benchi la ufundi.

"Uongozi umeamua kugawa kiasi chote cha pesa tulichopata kwa ajili ya kumaliza nafasi ya pili kwa wachezaji wetu na benchi la ufundi ili kuonyesha thamani ya kazi kubwa waliyofanya," alisema Jaffer.

Wachezaji hao wameanza likizo leo na wanatarajia kurejea mwezi Julai kuanza maandalizi ya msimu mpya wa ligi.