MZIMU WA LWANDAMINA BADO WAITESA YANGA

Kaimu kocha mkuu wa Yanga, Noel Mwandila amesema kuondoka kwa kocha George Lwandamina katikati ya msimu kunaendelea kuigharimu timu hiyo mpaka atakapoanza kazi kocha mpya.

Mkongomani Zahera Mwinyi amechukua mikoba ya Lwandamina lakini bado hajaanza kukaa kwenye benchi la ufundi kwakua hajapata vibali vya kufanyia kazi.

Mwandila amesema uwepo wa Lwandamina kwenye benchi kuliongeza kujiamini kwa wachezaji uwanjani ndio maana wameshindwa kupata matokeo katika mechi zao za karibuni.

Kuhusu sare ya bila kufungana waliyopata kutoka kwa Rayon Sports jana haikuwafurahisha kwakua walitakiwa kushinda kujiweka katika mazingira mazuri ya kusonga mbele hatua ya nusu fainali.

"Matokeo hayaja tufurahisha tulitakuwa kushinda mchezo wa jana lakini imeshindikana kwahiyo tunajipanga kwa mechi zijazo," alisema Mwandila.

Tangu kuondoka kwa Lwandamina mwezi uliopita Yanga haijashinda mchezo wowote ikifungwa minne na kutoka sare miwili.