BAADA YA NGOMA, AZAM KUTAMBULISHA KIFAA KINGINE KESHO

Uongozi wa klabu ya Azam FC umetangaza kuwa kesho saa sita mchana itatangaza usajili wa mchezaji mwingine katika ofisi zao za Mzizima mbele ya Waandishi wa Habari.

Taarifa ambazo zilizagaa kwenye mitandao mbalimbali ya kijamii mchana wa leo ni kwamba mlinzi wa kulia wa Yanga, Juma Abdul amemalizana na Azam na ndiye atakaye tambulishwa hiyo kesho.

Msemaji wa klabu hiyo Jaffer Idd  amesema mchezaji atakaye tambulishwa ni Mtanzania lakini amegoma kumuweka wazi mpaka hiyo kesho.

"Kesho saa sita mchana katika ofisi zetu za Mzizima tutatangaza usajili wa mchezaji wa pili tuliomsajili kwa ajili ya maandalizi ya msimu mpya wa ligi na michuano mingine," alisema Jaffer.

Wiki iliyopita Azam ilimtambulisha mshambuliaji Donald Ngoma kutoka Yanga baada ya kukamilisha usajili wake.

Jaffer amesema msimu ujao wamejipanga kufanya vizuri hivyo watafanya usajili mkubwa kutimiza azma hiyo.