AZAM: NGOMA NI RASHA RASHA SUBIRINI USAJILI MKUBWA

Baada ya kukamilisha usajili wa mshambuliaji Donald Ngoma klabu ya Azam imesema huo ni mwanzo tu wamejipanga kufanya usajili mkubwa msimu ujao.

Mchana wa leo Azam imetangaza kukamilisha usajili wa raia huyo wa Zimbabwe kwa mkataba wa mwaka mmoja baada ya kuachana na Yanga.

Msemaji wa klabu hiyo, Jaffer Idd ameufananisha usajili wa Ngoma kama mvua za rasha rasha kwani watafanya makubwa msimu ujao.

"Ni kweli tumemsajili Ngoma leo asubuhi kwa mkataba wa mwaka lakini haimaanishi kama itakuwa ndio mwisho bali tutafanya makubwa zaidi," alisema Jaffer.

Msimu huu unaomalizika wiki ijayo Azam ilifanya usajili kwa kutazama zaidi vijana lakini hawakufanikiwa kitu ambacho hawataki kitokee tena.

Wiki iliyopita Azam ilitangaza kuwa kwenye mazungumzo ya klabu ya Lipuli FC kuhusu kuhitaji saini ya mshambuliaji wao Adam Salamba ili kuongeza nguvu kikosini.