USHINDI WA NDANDA WAISHUSHA RASMI DARAJA NJOMBE MJI

Ushindi wa mabao 3-0 iliyopata Ndanda FC dhidi ya Mwadui FC umeishusha daraja rasmi Njombe Mji baada ya kushindwa kufikia alama walizonazo Wana Kuchele hao.

Njombe ana pointi 22 na hata kama itashinda mechi ya mwisho dhidi ya Mwadui haiwezi kufikia alama 26 hivyo ni rasmi watakuwa wameshuka daraja.

Ndanda inapambana na Majimaji yenye pointi 24 ambapo itatakiwa kushinda mechi ya mwisho dhidi ya Stand United katika uwanja wa Nangwanda kujihakikishia kubaki msimu ujao.

Majimaji itacheza na mabingwa wapya ligi hiyo timu ya Simba katika mchezo wa mwisho utakaopigwa katika uwanja wa Majimaji mkoani Ruvuma.

Katika mchezo wa leo Ndanda walicheza vizuri wakitengeneza nafasi nyingi za kufunga na kupata mabao mawili ya haraka ndani ya dakika tano kupitia kwa Jacob Masawe na Mrisho Ngasa.

Mwadui walionekana kushindwa kuendana na kasi ya wenyeji wao na kujikuta wakifungwa bao la tatu dakika ya 40 kupitia kwa Tiber John.

Baada ya kipigo cha hicho Mwadui imeendelea kusalia nafasi ya 10 ikiwa na pointi 33 ikijihakikishia kusalia ligi kuu msimu ujao.