SIMBA: MAJIMAJI MSITARAJIE YA KAGERA KUTOKEA TENA

Mabingwa wa ligi kuu ya Vodacom timu ya Simba imekiri ilitereza kufungwa na Kagera Sugar lakini katika mchezo wa mwisho dhidi Majimaji wamejipanga kuhakikisha wanashinda.

Kagera ilivunja rekodi ya Simba kuchukua ubingwa bila kupoteza mechi kufuatia kuifunga bao moja wikiendi iliyopita katika mchezo uliotumika kukabidhiwa ubingwa.

Kocha msaidizi wa timu hiyo, Masoud Djuma amesema hawafikirii kupoteza tena mchezo mwingine na wanajipanga kushinda mechi ya mwisho ili kutunza heshima yao.

Masoud amesema moja ya sababu iliyopelekea kupoteza mechi ya Kagera ni uchovu wa wachezaji wao kutokana na kucheza mechi nyingi mfululizo ndio maana waliwapumzisha baadhi ya nyota wao.

"Tulipoteza mechi ya Kagera na hatutapenda jambo hilo litokee tena katika mchezo wetu wa mwisho dhidi ya Majimaji," alisema Masoud.

Mchezo huo ni muhimu zaidi kwa Majimaji kwani inahitaji pointi tatu ili kujihajikishia kubaki ligi kuu msimu ujao baada ya kujikusanyia alama 24.