SIMBA KUWA KAMA BAYERN MUNICH

Uongozi wa klabu ya Simba umesema utatawala sana soka la Tanzania kama inavyofanya Bayern Munich nchini Ujerumani kama itafanikiwa kuingia kwenye mfumo wa hisa.

Simba ipo mbioni kuingia katika mfumo wa hisa baada ya bilionea Mohammed Dewji 'MO' kukubali kuwekeza asilimia 49 na Jumapili ijayo watafanya mkutano mkuu kubadili katiba ili kupitisha jambo hilo.

Msemaji wa klabu hiyo, Hajji Manara amesema wakifanikiwa kuingia kwenye mfumo huo hakutakuwa na timu ambayo itaweza kuwazuia kama inavyofanya Bayern nchini Ujerumani.

Bayern ni timu ambayo inafanya uwekezaji mkubwa kuliko zote Ujerumani na imekuwa ikitwaa ubingwa mfululizo kukiwa hakuna timu ya kuizuia.

"Ujerumani kuna timu zaidi ya 300 lakini hakuna ya kuisimamisha Bayern ndio itakavyokuwa kwa Simba kama tutaingia kwenye mfumo wa hisa," alisema Manara.

Tayari Simba wametawazwa mabingwa wapya wa ligi kuu ya Vodacom msimu wa 2017/18 na wamesalia na mechi mbili kumaliza ligi.