RASMI UNAI EMERY MENEJA MPYA ARSENAL

Baada ya tetesi karibia wiki nzima hatimaye Unai Emery ametangazwa kuwa Meneja mpya wa klabu ya Arsenal akichukua nafasi ya Arsene Wenger.

Unai aliiwezesha PSG kutwaa mataji manne likiwemo la ligi kuu ya Ufaransa msimu huu. kabla ya kutupiwa virago kufuatia kushindwa kufanya vizuri katika michuano ya ligi ya mabingwa Ulaya.

Kabla ya Unai kupewa kibarua hicho Mikel Arteta alikuwa akipewa nafasi kubwa kuchukua mikoba ya Wenger lakini Arsenal ilibadili gia angani na kumtwaa Mhispania huyo.

"Najisikia furaha kujiunga na moja ya klabu kubwa duniani, Arsenal inajulikana na inapendwa kote duniani kutokana na soka lake ikitumia zaidi vijana.

"Nafurahia kupewa majukumu ya kuanza maisha mapya ya kihistoria ndani ya Arsenal. Nilikutana na Stan na Josh Kroenke na kuzungumza nao kuhusu jambo hili na mipango ya maendeleo ya klabu," alisema Emery.

Hata hivyo Arsenal itapaswa kumpa kiasi kikubwa cha pesa kufanya usajili kwa ajili ya kufanya marekebisho ya kikosi cha Washika bunduki hao.