MWADUI YAPANGA KUISHUSHA DARAJA NDANDA LEO

Mwadui FC imetoa kauli ya kuikatisha tamaa Ndanda FC ambayo inapigania kuepuka kushuka daraja kwakusema itaifunga katika mchezo wa leo wa utakaopigwa Nangwanda Sijaona.

Ndanda ipo nafasi ya 15 kwenye msimamo ikiwa na alama 23 ikisalia na mechi mbili ambayo moja wanacheza leo na Mwadui wakiwa nyumbani.

Katibu mkuu wa Mwadui, Ramadhan Kilao amesema Ndanda itabidi ijitetee yenyewe na isitegemee huruma yoyote kutoka kwao kwakua wamejipanga kuibuka na alama zote tatu.

"Hatutakuwa na huruma yoyote kwa  Ndanda katika mchezo wa leo kama watashindwa kujitetea wenyewe tutawafunga na watashuka daraja," alisema Kilao.

Mwadui imejihakikishia kusalia kwenye ligi msimu ujao baada ya kujikusanyia pointi 33 ikiwa nafasi ya 10 kwenye msimamo.

Kama Ndanda itapata matokeo ya ushindi katika mchezo wa leo itakuwa imefufua matumaini ya kusalia kwenye ligi msimu ujao.