LIPULI YAKANUSHA SALAMBA KUJIUNGA YANGA

Uongozi wa klabu ya Lipuli imekanusha taarifa zilizozagaa kwenye mitandao ya kijamii kuwa mshambuliaji wao nyota Adam Salamba amejiunga na Yanga kwa ajili ya michuano ya kombe la Shirikisho Afrika.

Jana kulitoka taarifa kuwa Yanga kupitia kwa katibu mkuu wake Boniface Mkwasa wamemalizana na Lipuli kuhusu mshambuliaji huyo aliye kwenye kiwango bora kwa sasa.

Msemaji wa klabu hiyo, Clement Sanga amesema hawajapata barua yoyote rasmi kutoka Yanga kuhusu jambo hilo kwahiyo hawezi kulizungumzia kwakua halipo.

Sanga aliongeza kuwa Salamba yupo kwenye mipango yao ya baadae na hawawezi kumruhusu kuondoka hivyo amewataka mashabiki wa Lipuli kupuuza taarifa hizo.

"Hizo taarifa za Salamba kwenda Yanga sio za kweli, Yanga haijaleta barua yoyote kwetu kuhusu jambo hilo na mchezaji yupo kwenye mipango yetu ya baadae," alisema Sanga.

Salamba alichaguliwa mchezaji bora wa ligi mwezi Aprili baada ya kuwashinda washambuliaji Emmanuel Okwi na John Bocco wote kutoka Simba.