NENO LETU LA SHUKRANI KWENU

Wawakilishi wa Simba Damu Fans, Makongo All Stars na Wapenda Soka Tanzania katika picha ya pamoja mbele ya kaburi la SHOSE MASAO

Tawi la SIMBA DAMU FANS linapenda kuwashukuru wadau mbalimbali walioguswa na kushiriki moja kwa moja katika msiba wa mwanachama wetu SHOSE FIDELIS MASAO.

Mwakilishi wa tawi la Ubungo Terminal George Yona (wa kwanza kushoto) akimkabidhi mhasibu wa tawi la Simba Damu Fans Bernard Chezue (wa pili kulia) rambirambi yao kiasi cha TSH 150,000/=

Kwa kipekee kabisa tunawashukuru sana wenzetu wa UBUNGO TERMINAL waliositisha safari na kuungana nasi tulipokuta ajali eneo la Dumila mkoani Morogoro. Waliamua kuungana nasi kutoka saa saba mchana muda aliofariki marehemu Shose mpaka saa kumi na moja jioni tulipokabidhiwa mwili baada ya kukamilisha taratibu za kipolisi na hospitali. Na waliendelea kuwa nasi wakati wote na kutuchangia. Pia tunamshukuru sana mkuu wa wilaya ya Kilosa Mh. Adam Mgoi kwa kutupatia gari kwa ajili ya kuusafirisha mwili wa marehemu.

Makongo All Stars katika picha ya pamoja

Shukrani za dhati na za kipekee kabisa ziende kwa ndugu zetu wa MAKONGO ALL STARS walioshiriki kikamilifu toka mwili wa mpendwa wetu ulipofika katika hospitali ya Mwananyamala.

Salamu zetu za shukrani ziwafikie pia WAPENDA SOKA TANZANIA kwa namna walivyojitoa na kushiriki moja kwa moja katika safari ya mwisho ya mwenzetu.

Wapenda Soka Tanzania katika picha ya pamoja na baadhi ya wanachama wa tawi la Simba Damu Fans

Kwa dhati kabisa tunawashukuru pia wanachama wa Simba kutoka tawi la MSITU WA SIMBA kutoka Kingolwira mkoani Morogoro kwa pamoja na wale wa SIMBA KWANZA DUMILA kwa sapoti yao. Pia tunayashukuru sana makundi kadhaa ya Simba SC yaliyokuwa pamoja nasi na kutuchangia, UMOJA WA VIJANA SIMBA, UMOJA WA WANAWAKE WA SIMBA, SIMBA FOREVER, SIMBA NGUVU MOJA na wenzetu wa SIMBA SPORAA.

Rais wa Simba SC Evans Aveva (wa pili kulia) akiwa na makamu wake Geoffrey Nyange (wa pili kushoto) wakati wa ibada katika kanisa katoliki Magomeni

Mwisho kabisa tunapenda kuushukuru sana uongozi wa timu yetu ya Simba chini ya Rais Evans Aveva na pia shukrani za kipekee kwa makamu wa Rais Geoffrey Nyange ambaye tulikuwa nae bega kwa bega toka eneo la ajali mpaka siku ya mwisho.

MUNGU AWABARIKI SANA WOTE tuliowataja na ambao hatukuwataja pia

Mhasibu wa tawi la Simba Damu Fans (SDF) Bernard Chezue (mwenye t-shirt nyekundu kushoto) akimkabidhi mwakilishi wa familia Godfrey Fidelis Masao (kulia) rambirambi ya tawi na washirika wake kiasi cha TSH 908,000/=

MWENYEZI MUNGU MKUU AIPUMZISHE KWA AMANI ROHO YA MAREHEMU SHOSE FIDELIS MASAO

Kwa niaba ya kamati ya utendaji ya SDF
Severin Machila
Kaimu M/kiti
Simba Damu Fans