SIMBA YAMSHUKURU JPM KUKUBALI KUWAKABIDHI TAJI LAO LA UBINGWA

Kaimu Rais wa klabu ya Simba, Salim Abdallah 'Try Again' amemshukuru Rais wa Jamhuri ya Muungano wa Tanzania Dk.John Magufuli kukubali kuwakabidhi taji la ubingwa kesho katika uwanja wa Taifa.

Simba itatumia mchezo wa kesho dhidi ya Kagera Sugar kukabidhiwa taji la ubingwa katika mtanange unaotarajiwa kuanza saa 8 mchana katika uwanja huo.

Try Again amesema Rais amewapa heshima kubwa kukubali kuacha mambo yake ya kitaifa na kujimuika na wana Simba katika tukio hilo la kihistoria.

Kiongozi huyo amewataka wapenzi na mashabiki wa klabu hiyo kujitokeza kwa wingi kusherehekea ubingwa huo waliousubiri kwa miaka sita.

"Nichukue nafasi hii kwa niaba ya Uongozi wa klabu ya Simba, kumshukuru Rais Magufuli kwa kukubali kuja kutukabidhi kombe la ubingwa baada ya mechi yetu ya Kagera.

"Kikubwa niwaombe mashabiki na wapenzi wa Simba kujitokeza kwa wingi ili kusherehekea pamoja ubingwa wetu," alisema Try Again.