PRISONS YAIPA UBINGWA SIMBA, YANGA YAKUBALI YAISHE

Timu ya Yanga imevuliwa ubingwa rasmi baada ya kukubali kipigo cha mabao 2-0 kutoka kwa Tanzania Prisons katika mchezo uliopigwa uwanja wa Sokoine.

Matokeo hayo yanaifanya Yanga kushindwa kufikisha pointi 65 ambazo Simba inazo mpaka sasa licha ya kubakiwa na mechi tano mkononi.

Hii ina maana Simba itaingia katika uwanja wa Namfua siku ya Jumamosi kucheza na Singida United wakiwa wametawazwa mabingwa.

Yanga iliingia kwenye mchezo huo ikiwa na wachezaji 13 wa kikosi cha pili na kocha Shadrack Nsajigwa kitu ambacho ilitegemewa kukubali kipigo hicho.

Mabao ya Prisons yalifungwa na Eliuter Mpepo kwa mkwaju wa penati dakika ya 57 na Salum Bosco dakika ya 82.

Prisons imefikisha pointi 44 ikiwa nafasi ya nne kwenye msimamo wa ligi ikisalia na mechi mbili kumaliza ligi.

Jumapili Yanga itacheza mchezo mwingine wa ligi dhidi ya Mtibwa Sugar katika uwanja wa Jamhuri mkoani Morogoro.