CHILUNDA ATUPIA KAMA BALE, AZAM IKIINYANYASA YANGA TAIFA

Mshambuliaji Shaban Idd 'Chilunda' ameifungia timu yake ya Azam bao safi la tik tak katika ushindi wa mabao 3-1 iliyopata dhidi ya Yanga katika mchezo wa kufungia msimu wa ligi 2017/18.

Bao hilo la Chilunda linafanana na lile la winga wa Real Madrid, Gareth Bale alilofunga dhidi ya Liverpool katika mchezo wa fainali ya ligi ya mabingwa Jumamosi iliyopita.

Chilunda alifunga bao hilo dakika ya 59 baada ya kupokea mpira wa krosi uliopigwa na Yahya Zayd kutoka upande wa kulia.

Matokeo hayo yanaifanya Azam kumaliza nafasi ya pili kwenye ligi baada ya kufikisha pointi 58 alama 11 nyuma ya mabingwa Simba.

Azam ilitawala karibia mchezo mzima ambapo mabao mengine yalifungwa na Zayd dakika ya nne na Salum Abubakar 'Sure boy' dakika ya 67.

Yanga imemaliza ligi vibaya kufuatia kupoteza mechi tano katika mechi sita zilizopita.